ក្លារីនេតគឺជាឧបករណ៍តន្រ្តីដ៏ពេញនិយមមួយប្រភេទ ដែលត្រូវបានយកមកសម្តែងនៅក្នុង​ការប្រគំ​តន្រ្តី​ពិសេសៗមួយចំនួន ហើយភាគច្រើននៅតាមតំបន់ បច្ចឹមប្រទេស។​ ដើម្បីជាការអបអរសាទរ​ដល់ទិវា វប្បធម៌លើកទី៦របស់ CJCC មជ្ឈមណ្ឌល បានអញ្ជើញក្រុមកុមារកម្ពុជាដែលកំពុងតែ​សិក្សាពីរបៀបនៃការលេងឧបករណ៍ក្លារីនេត មកធ្វើការសម្តែងជូនដល់ សាធារណជនកាលពី​ថ្ងៃទី១៩ ខែកុម្ភៈ ឆ្នាំ២០១១កន្លងទៅនេះ។ ទោះបីជាពួកគេមានអាយុនៅក្មេងក៏ដោយ ក្រុមកុមារ​កម្ពុជាទាំង៦រូបនេះ បានបញ្ចេញ​នូវទេពកោសល្យ​របស់ខ្លួនយ៉ាងអស់ពីសមត្ថភាព ដើម្បី​​បន្លឺជូន​​នូវ​សម្លេង​តន្រ្តី​ដ៏ពិរោះដែលអាច​ទាក់​ទាញ​ទស្សនិកជន​ប្រហែលជា១០០នាក់ឲ្យចូលរួមស្តាប់​នូវការ​ប្រគំ​​របស់ពួកគេ។ នៅចុងបញ្ចប់នៃកម្មវិធី លោក កឹម អឿន នាយកមជ្ឈមណ្ឌលសហប្រតិ​បត្តិ​ការកម្ពុជា-ជប៉ុន និង លោក បាន តូស៊ីអូ ទីប្រឹក្សានៃមជ្ឈមណ្ឌលសហប្រតិ​បត្តិការកម្ពុជា-ជប៉ុន​បានប្រគល់ជូននូវវត្ថុអនុស្សាវរីយ៍ដល់កុមារទាំង៦រូបសម្រាប់ការសម្តែងដ៏ល្អរបស់ពួកគេផងដែរ៕

បន្ថែមជាងនេះទៅទៀត ស្របពេលជាមួយគ្នានោះផងដែរ មជ្ឈមណ្ឌលក៏បានរៀបចំបម្រើជូន​នូវនំម៉ូជិជប៉ុនដែលធ្វើឡើងពីអង្ករដំណើប ពិសាជាមួយសណ្តែកសៀង និងសណ្តែកក្រហមដល់​អ្នកចូលរួមចំនួន១០០នាក់។​ ពួកគេភាគច្រើនពិតជាបានសប្បាយរីករាយនឹងការភ្លក្សនំដែលមាន​រសជាតិឈ្ងុយឆ្ងាញ់ ហើយពួកគេចង់សាកល្បងនៅពេលក្រោយៗទៀត៕