កាលពីថ្ងៃទី២៧ ខែសីហា ឆ្នាំ ២០១១​ មជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) បានរៀបចំថ្នាក់បង្រៀនរៀបផ្កាតាមបែបជប៉ុនដែលបានទទួលការបង្រៀនពី​ អ្នកនាង​ អ៊ុយ សុភាព បុគ្គលិកកម្មវិធីផ្លាស់ប្តូរវប្បធម៌នៅ CJCC ដែលបានបញ្ចប់ការសិក្សាមកពី សាលារៀបផ្កា អូហារា នៅប្រទេសជប៉ុន។ អ្នកនាងក៏ជាសមាជិកក្នុង ក្លឹបស្រ្តីអន្តរជាតិ នៅប្រទេសជប៉ុនផងដែរ។

អ្នកនាងបានបង្រៀនពីការតុបតែងលំអផ្កាមួយបែបមានឈ្មោះថា តាទេរឹ​ កាតាឈី ដែលមានន័យ ជាភាសាខ្មែរថា ម៉ូតផ្កាបញ្ឈរ ​ហើយក៏បានដាក់បង្ហាញម៉ូតចំនួនបួន ផ្សេងទៀតដូចជា ហ៊ីរ៉ាគុ ណារ៉ាបេរឹ ម៉ាវ៉ារឹ​ និង កាតាមឹគេ​ ផងដែរ។​

មានអ្នកចូលរួមចំនួន​ ៣០នាក់ បុរស៤ និងស្រ្តីចំនួន​ ២៦នាក់។ អ្នកចូលរួមទាំងអស់បានបង្ហាញ នូវសេចក្តីរំភើបរីករាយជាខ្លាំង ដោយបានឃើញនូវម៉ូតផ្កាបែបជប៉ុន​ដែលមានលក្ខណៈសាមញ្ញ ប៉ុន្តែគួរ ឲ្យចាប់អារម្មណ៍។ អ្នកចូលរួមជាច្រើនមានបំណងចង់ចូលរួម ថ្នាក់រៀននេះម្តងទៀត ហើយពួកគេបានស្នើឲ្យ មជ្ឈមណ្ឌលបង្កីតនូវ ថ្នាក់រៀនពីវប្បធម៌ជប៉ុន ផ្សេងៗទៀតដូចជា ថ្នាក់រៀនធ្វើម្ហូប បែបបទនៃការទទួលទានអាហារ ជាដើម៕